كيف تسوي مكرونه جبن بطرقتين

السلام عليكم

+_بالعافيه



............................

خصوصاً يعني اني احب الطبخ والمطبخ و أحب الاكل جداً جداً جداً بس ما احب غسل المواعين وهذا إلي يخليني أعيش أغلب أوقاتي ... على التشيبس و التوست و الجبن والشوربة الجاهزة ...


بس أحياناً يعني أكسر خاطر روحي و أطبخ ... آخر مرة كسرت خاطر روحي كان أول أمس أو قبل أمس أو اليوم الذي يسبق الامس :)


كنت أجوف حلقة من دارما أند غريغ dharma and greg على يوتوب ... وكان في طفلة متعلقه فيهم و غريغ كان يحاول يأكلها سمج ... بس هي مو راضية تاكله و لما دارما عطتها مكرونة بالجبن نطت على الطبق و أكلته :)


فقلت ليش ما أسوي مكرونة بالجبن ... و طبعاً كالعادة ما طالعت وصفة المكرونة بالجبن ... قررت إني اسويها مثل ما أنا فاهمتها ... و يعني الله يخلي أيام البحرين إلي كنت فيها طول الوقت منسدحة و أطالع فتافيت ... أعتقد إني في هاذيك الفترة كونت ثقافة مطبخية غنية و غزيرة و كثيفة و جيدة :)





المهم خلونا في فحوى التدوينة ...أنا سويت كمية و كفتني ليومين ... فسويت تغيير بسيط على الطبق في اليوم الثاني





المقادير (المقادير تكفي لشخص واحد سمين/شخص أكول أو عشا ليومين لشخص نحيف إلى متوسط):





مقادير الليلة الأولى...مكرونة بالجبنة أكشن ...





- 3 كمشات مكرونة ... أي نوع و أي شكل تبونه بس نصيحتي لا تكون سباغيتي و لا تالي تيلي و لا لنجويني ( يعني الانواع الطويلة ممنوع)


- نصف كاس حليب سائل ( يعني ممكن ملعقة حليب بودرة و نصف كاس ماي :) )


- 5 أو 6 شرائح جبنة توست شيدر


-ملعقة جبن سائل


-رشة فلفل أسود


-رشة بابريكا (فلفل بارد)


-رشتين و شويات سبنت أو شبنت أو شبت مجفف


-رشة بصل بودرة مطحون


-رشة ثوم مطحون


-ملعقة زيت أو زبدة حسب الرغبة


-ملح و زيت زيتون لسلق المكرونه ... او ممكن بدل الملح مكعب مرقة دجاج أو خضار





الطريقة:


- يغلى الماء مع الملح أو مكعب المرقة و الزيت ... و بعد الغلي تضاف المكرونه و تحرك شوي ... بعدين تترك لتغلي من 8 إلى 9 دقايق أو حسب التعليمات الي على العلبة ... أو حسب التجربة <<< شخصياً اعتمد على التجربة و كل شوي اخذ مكرونة وحدة واتذوقها اجوفها استوت وإلا لا :)


-تصفى المكرونة من الماء وتترك جانباً


- توضع الزيت او الزبدة على النار و تترك لين تسخن شوي ... وبعدين تنظاف البهارات( بابريكا + فلفل اسود+ بصل مطحون+ثوم مطحون+ شبت مجفف) و تحرك جيداً


- يضاف الحليب للمزيج ... ثم تضاف الجبنة و تحرك جيداً لحد ما تسيح ... ويصير المزيج ثخين شوي


- تضاف المكرونة على الخليط وتحرك جيداً لحد ما تتغطى بالخليط ...


- وبعدين تغرف في طبق و تؤكل بالملعقة ... و بالهناء والشفاء ...





***





فرضاً يعني صار عندكم مثلي فائض تقريباً نص الكمية ... تقدرون تسون مثلي تتعشون فيه يوم ثاني مع بعض التغييرات ... أو كيفكم عاد تتغدون أو تتبرعون فيها ...





المهم مكرونة بالجبن أكشن يوم ثاني... المقادير الاضافية:


- ربع كاس حليب


- 2 شرائح جبن شيدر


-ملعقة جبن سائل


-ملعقة صلصة طماطم ( مو كتشب... لا... معجون طماطم)


-رشة اوريجانو


-رشة بقدونس مجفف أو طازج حسب المتوفر





الطريقة :


- يضاف الحليب على بقايا مكرونة أمس ... طبعا والقدر على النار


-يضاف الجبن و صلصة الطماطم ويخلط لحد ما يسيح الجبن و يختلط بالحليب


- يضاف الاوريجانو مع البقدونس ويقلب ثم يرفع من على النار


-يوضع في طبق و يقدم ... يؤكل بالملعقة او الشوكة لكم حرية الاختيار





***





امممممممممممممممم تعليقات ما بعد الأكل:


طبعاً المكرونة أول يوم كانت لذيذة ... بس برايي مع أضافات ثاني يوم كانت ألذ... و انتوا جربوا و أحكموا

تسلمين

منوره